Носир Хусравов

   Носир Хусравов дар моҳи майи соли 1958 дар деҳаи Рохарв таваллуд ёфта, мактаби миёнаи №4-и маркази ноҳияро хатм намудааст. Аз хурдсолӣ ба гӯштингирӣ шавқу рағбат дошта, бо ҳамсолон дар рӯи регу сабза машқу тамрин мекард. Дар мусобиқоти мактабӣ, ноҳиявӣ ва вилоятӣ оид ба гуштини миллӣ ширкат варзида, доимо дастболо мегардид. Баъди хатми мактаби мёна дар соли 1975 ба шаҳри Душанбе омада, таҳсилро дар Донишгоҳи тарбияи ҷисмонӣ ба номи М. И Калинин идома дод.  
  Дар соли аввали донишҷӯӣ (соли 1975) дар чемпионати ҷумҳуриявӣ ҷой дуюмро ишғол намуд. Ҳамон сол дар чемионати кушоди Қирғизистон оид ба самбо баромад карда, соҳиби ҷои аввал ва медали тиллоӣ гардид. Соли 1976 дар мусобиқаи ҷудо Чемпиони Тоҷикистон шуда, дар чемпионати умумишуравӣ оид ба самбо дар шаҳри Ашқободи кишвари Туркманистон соҳиби медали тилло гашт. Дар соли 1977 боз Чемпиони Тоҷикистон оид ба самбо ва ҳам ҷудо шуд. Дар ҳамин сол дар шаҳри Мински Беларус медали тиллои мусобиқаи самбо ва ҷои якум дар мусобиқот барои ҷоизаи рӯзномаи “Комсомолец Таджикистана”-ро ба даст овард.
  Дар соли 1978 чемпиони ҷумҳурӣ оид ба самбо ва ҷудо шуда, дар мусобиқаи байналмилалӣ оид ба самбо дар шаҳри Киеви Украин медали тилло ва дар сабқат барои ҷоизаи Блюхер дар шаҳри Маскав медали биринҷӣ гирифт. Дар соли 1979 чемпиони ҷумҳурӣ оид ба самбо ва ҷудо шуда, дар спартакиадаи XIII Ҷумҳурии Тоҷикистон соҳиби ҷой якум ва дар спартакиадаи халқҳои ИҶШС соҳиби ҷои панҷум гардид. Дар соли 1980 чемпиони ҷумҳурӣ оид ба самбо ва ҷудо гашт.   
  Носир Хусравов баъди хатми донишгоҳ ба зодгоҳ баргашта, дар мактаби №9-и деҳаи Мурғутга то соли 1982 ба ҳайси муаллими тарбияи ҷисмонӣ кору фаъолият кард. Соли 1982 мудири шӯъбаи варзиш ва тайёрии ҳарбии Кумитаи комсомоли ВМКБ таъин шуд ва дар ҳамон сол ба хизмати ватан даъват шуда, онро дар шаҳри Белогорски вилояти Амур адо намуд.  
  Пас аз хизмати аскарӣ ба ватан баргашта, дар макотиби №63 ва №41-и шаҳри Душанбе ба сифати муаллими тарбияи ҷисмонӣ кор кард. Соли 1986 ба зодгоҳаш ноҳияи Ванҷ баргашта, издивоҷ намуд ва ҷонишини мудири мактаби варзишии ноҳия таъин гардид. Аз соли 1987 то соли 1998 дар мактаби №4 ҳамчун муаллими тарбияи ҷисмонӣ ва аз соли 1998 то соли 2013 мудири мактаби варзишии ноҳияи Ванҷ кор намудааст.  
   Носир Хусравов беш аз панҷоҳ нафар устоди варзиши Ҷумҳури Тоҷикистон, панҷ нафар устодони варзиши дараҷаи байналмилалӣ як нафар устоди шоистаи Ҷумхури Тоҷикистонро парваридааст ва ҳамаи ин хизматҳои ӯро ба назар гирифта, ба Н.Хусравов унвони Мурабби шоистаи Ҷумҳурии Тоҷикистонро лоиқ донистаанд. Аз соли 2013 ин ҷониб ба ҳайси сармураббии дастаи мунтахаби ВМКБ кор ва фаъолият дорад. Фарзанди ӯ  Хушқадам Хусравов ҳамчун вориси падар яке аз беҳтарин паҳлавонони соҳибному унвони диёру кишвар дар майдонҳои кишвару ҷаҳон фаъолият дорад.

Замима аз китоби Ванҷ

  Носир Хусравов устоди варзиши ИҶШС оиди тарзҳои самбою дзюдо, устоди варзиши Ҷумҳурии Тоҷикистон мебошад. Носир соли 1958 дар деҳшӯрои Рохарви ноҳияи Ванҷ ба дунё омада, ғурури ҷавонмардӣ дар қалбаш хеле барвақт, ҳанӯз аз солҳои мактабхонӣ бедор шудааст. Дар мусобиқаҳои вилоятӣ ду карат ғолибияти пурра ба даст даровардааст.
  Баъди хатми мактаби миёна, соли 1976 ба Донишкадаи тарбияи ҷисмонй дохил шуда, имконияти пурра пайдо намуд, ки бевосита ба касби дӯстдоштааш машғул шавад.
  Ҳанӯз дар давраи донишҷӯи соли якум буданаш (1976) дар мусобиқаи гӯштии умумииттифоқй оиди тарзи самбо дар Қиргизистон ширкат варзида, соҳиби аввалин медали тилло гардид. Ҳамин нишондиҳанда дар мусобиқаи умумииттифоқй доир ба гӯштии тарзи дзюдо дар Ашқобод (Туркманистон) такрор ёфт. Инчунин дар Минск (Белорус) доир ба самбо ҷои аввал насибаш гардид.
  Носир Хусравов ба қатори паҳлавононе дохил мешавад, ки чандин маротиба дар мусобиқаҳои расмии ҷумҳурй ҷои аввалро ишғол намудаанд. Ӯ 8 маротиба қаҳрамони варзиши Ҷумҳурии Тоҷикистон дар мусобиқаҳо оиди самбо, дзюдо ва гӯштии тоҷикӣ гаштааст. Чунин дастовард ба кам андар ками паҳлавонон насиб шудааст. Чунин нишондиҳандаҳо дар фаъолияти варзишии ин паҳлавони асил кам нест.
  Чизи дигаре, ки аз ҳаёти ин ҷавонмард ба назар мерасад, меҳри хосаи ӯст нисбати диёр. Баъди хатми донишкада ба кор ба мактаби 8 солаи № 9-и Марғутга (деҳшӯрои Рованд) баргашт. Соли 1982 ӯро ба сифати корманди шӯъбаи варзишӣ-ҳарбии кор бо омма дар назди Кумитаи комсомоли вилояти худмухтори Бадахшони Кӯҳистон таъин намуданд. Баъди адои хизмати ҳарбӣ соли 1984 чанде ба ҳайси муаллими мактаби миёнаи №41 шаҳри Душанбе кор карда, боз аз нав ба диёр баргашт, чун ҷонишини директори мактаби варзиши бачагонаи ноҳияи Ванҷ адои хизмат дорад. Ба шиноварию човандозй, мутрибию сарояндагӣ низ рағбати баланд дорад.
  Ин марди майдон, ки худ бевосита аз мактаби варзиши устодони баландмақом Ҳукуматшо Ғайратов, Маҳмадшариф Сулаймонов, Исмат Абдуллоев гузаштааст, дар тарбияи садҳо ҷавонмардони ҳозираю ояндаи диёр саҳмгузорӣ хоҳад кард. (Аз китоби “Ванҷ-и Ҳ. Пирумшоев).