Шеърҳо ба забони язгуломӣ

Аҷаб наwдāат

Хəшқада қомат, аҷаб наwдāат,
Нозанин, меҳрубонат, пəхтāат.
Хəбрӯенан манор əн дəнйе,
Тоwат нак wу̊ тоқаат, бəстāат.
Ти базибай ҷа на x̌ер виѓ δада,
X̌əтараѓ, йо ḱе Масти парчāат.
Эй фариx̌тāи асмен, ма зəмаδ,
Парии x̌ер, йо ḱе пəx̌тāат.
На малоикат, на хулқи башар,
Дурри дарйот, йо наж чəx̌мāат.
Зəѓамиѓан аҷаб базиб wəратен,
Тоwат ам хəшриат, ам хассāат.
Лап маноран ошəқи зор ма ту,
Асали ху̊γ̌ йо, ḱе маскаат.
Ошəқаϑан катер, катер ту̊ бе,
Нури малāат, г˚ол əн бохчāат.
   Абдулқодир Алавӣ. Маскав. 23.03. 2020.

Ту манек йор наwинта

Йу̊здоми ғачаѓ мон ту манек йор наwинта,
Рāнги ту паризодəм ма кӯҳсор наwинта.
Наж Мāст рəx̌анду̊р, банурду̊р на Хəwу̊рат,
Рāнги x̌əтараѓ ат əн шаби тор нəмəхта.
Катеран лəwəнден тубе, йоx̌а бийоx̌ан,
Мон тира манек йоға харидор наwинта.
Йу̊здоми ғачаѓ, wу̊гаϑи риат зəнада ту,
Рāнги туəм мон wу̊ гəли бехор наwинта.
Ар чон k˚əнин wасф шəту̊, веай тира кум,
Ни қоматат, ни номусат, ни ор вəрəx̌та.
Йорат, ḱе нийуд, чəрат ни ағйор нийу̊д ту?
Мон дар ғами ту шеъри аламдор нəвəшта.
Ни заwδат ḱийа йах ата ни кāлат δада хум,
Мон йоға манор хорай-ат озор наwинта.
Wу̊ дам ба ху̊д за, пəсе йайда идаб кас,
Ту йоға ичаϑ ёри вафодор наwинта.
Наж Бағн бадəмата зайəм мох и x̌ийанга,
Маш йуки замон марами асрор нарəғда.
Бāд ёри Алӣ вах ата дилдори Алӣ вах,
Мон ғайри ту дəр wу̊ тани дидор накəx̌та.
             Абдулқодир Алавӣ. Маскав. 24.08.2019.  

Айф накəн əмри ҷавон

Ни зиндаѓайат дар ғами худ ќег вайрон,
Ғайри ту əн хи заwδ-əм нйаст мон армон.
Ни əx̌āт йада, йоx̌а бийоx̌əм би ту,
Тəрху̊ма агаəм əн ти ғам саргардон.
Дəнйеай манор наста əмрай δоw миϑ,
За қāр накəн, айф накəн əмри ҷавон.
Пиран мад ата мон ти wафоѓай наwинт,
Бат на ни мəраҷ кош k˚əнай қадр жəмон.
Ёвло-да k˚əнин хи масти рӣ мора аx̌аw,
Ни ҷен, ḱе лафай ќəнинда тира қ̊əрбон.
Азда налафин, хи ҷен тоw мора аҷа,
Хи пəфа нафас қатай жəмон кəн дармон.
Əмр шодат, хəwу̊р ма мəзғаваран рəғда,
От вах бари мон, ќе аз мəрин биармон.
              Абдулқодир Алавӣ. Маскав. 14.06.2019.

Тоw-ат наяст анəз

Дəнйе баҳор мəда ата тоwат наяст, анəз,
Зин ҷа тайёр мəда ата тоwат наяст, анəз.
Бимера бимадорəма, тоwда чəра бияй?
Ни йаx̌ќай x̌у̊ қатор ата тоwат наяст, анəз.
Сармо wəрағда йат баҳорат хəwу̊р сада,
Сəвза манор дəмта ата тоwат наяст, анəз.
Ар чон налāx̌ k˚əнин, тоwат кāра гəл мəда,
Тəx̌нагəм ти дидор беат, тоwат наяст, анəз.
Чораəм ҷа ба ғайри мəраҷ нест, əн фироқ ,
Би хиx̌а би таборəма, тоwат наяст, анəз.
Хи хоба хи хайлəм бийанта ту қатай ,
Сəтəx̌и бинаорəмат, тоwат наяст, анəз.
Миϑта wəрахста азда wəзиwин əн ти ғам,
Зор- зори Гəлизорəма, тоwат наяст анəз.
Наж фикр ата дар ғами туəм алок мəда,
Кар да барор намит ага тоwат наяст анəз.
Алаwиат хо ту пəша ху̊д дарбадар ќийа ,
Тəx˚та ата, кабобəмат , тоwат наяст анəз.
              Абдулқодир Алавӣ. Маскав. 06. 04. 2019.

Дар васфи Муҳаммад(с)

Əн дəнйеай ки Шту x̌уй?
О ни Расули хəбруй.
Товат кəлра ниx̌она̄,
Ниx̌она̄и дурдона̄.
Ти заяҷ дар ю дəнйе,
Кəлра ид вад əн ҳа̄р ҷе.
Хв̌ура ма̄ста x̌әтарежг,
Та̄ъзимəф ќег дар ти пед̌.
Саҳобат̌и ти дав̌ра̄,
Олиман мад, замона̄.
Ша̄бай рəx̌най ќег Ти ри,
Зəлмай нест ќег Ти нармӣ.
Нахустин амри Хәдо,
Тираѓан ят əн Ҳиро.
В̌ай амрат̌ат кəлра ла̄фт,
Хи ҷенат иччат̌ нала̄фт.
Наж ав̌в̌а̄лат вад ра̄зѓин,
Да̄беф ќег Ти нəм Амин.
Ти хəбая Ти ҷадай,
Ти кяра̄т̌а Ти рәзѓяй,
Мадан мохра зəндагяй.
Əн рафтора əн гәфтор,
Тов̌ат мохра нотакрор.
Вəгат мохра иттиҳод,
Мардəма̄т̌ан мад тифоқ.
Наж Билоли ҳабашай,
Ќегат марди ҷаҳонай.
В̌уган мад кəл əн дəнйе,
Ти таблиғбе əн ҳар ҷе.
Лап манорəф ќег Шту қин,
Ти дəx̌манат̌и хойин.
Неке Штуай Хəдов̌анд,
Əн дəнйе ќег тав̌онманд.
Наж машриқат наж мағриб,
Кəли мохан Ти мəрид.
Ти хəбай чонке лафəм,
Куман лафта̄г, ждай взанəм.
Наж Макка̄ат дар Ақсо,
Шодат меъроҷ пта Аллоҳ.
Вəгат мохра асенай,
Нəмозат̌и пенҷгонай.
О деда̄т̌а о нанежг,
О врада̄ра о фагежг,
Бат наж Хвәд̌ойи хаса̄,
Амин мохра намуна̄.
В̌ай гапат̌ хо гуш кəнəм,
В̌ай сəннатҷа ҳифз кəнəм.
Шаҳриёр мит Ти қəрбон,
О Амин, о Расулҷон.
     Шаҳриёри Бадахшӣ. Маскав. Декабри соли 2020.

Хоинаṭра

Аҷəб дəнйе мəда дəнйеи фонай,
Нарəғда мохра маш ву холи ҷенай.
Ки вред наж вреда вашт хи бидинайбе,
Накяста ичкиҷе хи манфиатбе.
Намит тмохра насиб аҷри Хвəžоай,
Винита кəл тмох хора залилай.
X̌aвита озераṭ тмох шхуд мəсəлмон,
Кясай самҷе, мəдагəф номəсалмон.
Кəли мохта взанəм ки дини Ислом,
Наястай иччаṭ айб əн худи аҳком.
Ага мантиқа гапи разгҷе ғвəфсəм,
Кəли айбаṭан əн мох, на əн Ислом.
Виəм гар аза тов вуг əн хи ойин,
Накəx̌т шайтон хи макраṭ мохра талқин.
Кясит Исломда чиг лефт мохра ҳар бор?
Хи деда нан, хи хиx̌аṭ xо накəн хор.
Биҳиx̌ту воби мохи нани пеžаṭ,
Бракатхо мох зазəм ифҷе ю миṭаṭ.
Лавəндени зəран яст мох згямигяṭ,
Ду зəр əн илмҷа мит бояд, ни леяṭ.
Фагежги муъминан яст, масти парча,
Кясаҷ жифай, кəли мохра вазифа.
Нəмохтан мох згямигяṭ наж хи x̌ераṭ,
Киягай žар ғарибай, жмох на хиx̌aṭ.
Заит кəл вуг виəм мох əн ю дəнйе,
Хи андеx̌а хи имонҷа кəнəм беҳ.
Хи žустаṭа Хвəžойҷе аз ясин тур,
Ки мит мохи згямиги нəм баландур.
                                     Шаҳриёр Бадахшӣ.